Телефоны чох Анатолий Егорович
Хайран чiг сағызымны хайнатча ам даа:
Хайди за пас чӧрче ол… ысмартфоны чох!
Хайди за хала парча ол… табырах табыстығдаң?!
Хыйғааҷах хабарағастардаң тудынча кидер,
(Туған-чағыннарыбыстың за iзiг тылаастары
Хайдағ даа туйухтағызын ӱтир тiлге),
Че пас чӧрче хал тирiгi чох Анатолий Егорович!
Пастап мин хахап турҷам пiл полбас ол хылынысха,
Пастап мин алчаастанҷам ӧтiргеезек сағызахха,
Тибес, аның миизi – кизе тоғыр наа нименең,
Тибес, ал полбинча ол процессорлар чазыдын!
Че мағаа даа килдi ол… килдi ол чылхы,
Хаҷан син пiлчезiң, пазох тоң хысхы,
Харлар-пораан тоозыннаң хуйунни толғалып,
Пазох ла сырайыңа тастир оох iзиин,
Пазох ла ах хары, пулғалып хара чирге,
Пазох ла хара тирнең сӱрчедер ынҷиимны,
Алай ба ах сағысха тiрене, кибеллир (ирдеңнир!)…
Хаҷан син пiлчезiң хабарларның азығын,
Хаҷан син сисчезiң Худайларның чазығын,
Хаҷан син Хан Тигiр ӱтеп, пiлчезiң пос чориин…
Кирек ни хайдағ-да тылаазах… хончииңның?
Парчан пу тiмеленчеткен тимiрлер-тизi,
Ысматрофннар пасха ханның, хайдағ-да гаджеттер,
Олох интеренеттiң субараан хабарахтар…
Хайди-да ам сағынчам Анатолий Егорович,
Хайди-да орта чолны, неке, полталапча! –
Пу даа тадар сӧзiмнiң ноо-да кибелекте,
Пар ни зе чазыды, алғым тiмелестiг?..
