Тадар чирнiң ил саринда
Ыраххы Варанасиде
Пар алынҷа кизегес чон, –
От чалынның хадарчызы,
От ээзiнiң кӱзетчiзi,
Иптiг чуртастың тозызын,
Чоннар аймахтар ооғазын,
Орназып Худай чолына,
Хут азынып… тастаан!
Хаттар чыстарның тадиина,
Сын чолынҷа парчам тiп,
Ол аарда хаптырбаан.
Кӱннең кӱнге от одынып,
Ӱреен кiзее тын ходырып,
Пӱктеп-пӱргеп чағ-чанын,
Чон чазығы ачаанынаң,
Таң пар, таң чох тiгi чирге,
Алғап-толғап алғас-ылғаан
Ызых суғ ағын чолынҷа
Талайға салдырча…
Ок, Садху… чыстығ позынаң
Ӱтертiп кибiр хоозынаң,
Чоннарны-киртiнҷектернi,
«Ызых» тiп Шива адынаң,
Сынны хыртып чiг миизiнең,
Пулғап ыстығ чыс киизiне,
Айландырча… отха, –
Чуртас кӧрбес хутха…
Хурсах, тiзең, Худай пiлбин,
Ызиин дее китебин,
Кирексiпче халазахты,
Суғ оортамын айағастаң
Тох тоғына киректеп чи!
Эк, Садху… Мин дее сағынғам,
(Ноға-да киртiнгем!)
Анда, им-том тiп Ганг суғ
Ызиин тарадып Садхуларға
Аарда харанмаан,
Ӏзiг от чалын сағылын
Ил сағыснаң алғаан!
Мында, кӧрзем, ютубағаста
Рупий саны сабыхсии
Холдаң холға сурана чӧр,
Килген чоннарға суурын тур,
Ызиин сада, холда туда
Хайран ахчаҷах чаҷынын… –
Тiлен чӧрче Худай хулы,
Сағаланған кiзi оғлы…
Пыром таста, Эк, Садху –
Мин дее ол син ызииңны,
Ахчаҷағас ӧң ооғынаң,
Кемге полза, нымах салам,
Чонға полза, узах салам
Тимнеен олаңай одыңнаң,
Суғаа салған салачынаң…
Мин дее тысчам … хамнаанымны,
Сын сӧзiмнiң толғаанымны:
О, Садху! Нымахтарыңны
Син сал аймах чоннарға…
Че сын чирнiң чозағын сын
Тутча сӧсчi Ил хабында
Ахчаҷағасха садынмин,
Ырых тӧреел-чiриинге дее
Ызии пар Шиваа сабылбин,
Тадар чирнiң пу саринда
Олаңай чатхан хағып,
Олаңай тахпах салып…
