Че, 2021-ҷі Наа чыл кӱннері пасталыбысты, мин дее пазох узарат кӧрим позымның кӧңнім кӧдірілізін – чылхадаңар. Орыстап чоохтаза – навыки. Хайдағ даа кізі ол ноо-да чылхалар чыындызы.
Кӧзідімге алза, кем-де пір ле тілнең чоохтас полча, кем-де, тізең, он аймахтинаң ноолча…
Пірсінде ӱс харындас (пиҷем, мин паза туңамам) Асхыссар электричкалығ хада парчатчабыс. Чоох-чаах аразында мин пиҷемнең сурастырғлапчам: нинҷе аймах-пасха ниме ит полчазың? Анаң санап сыххабыс:
1. чіҷең ниме итче;
2. тағыран полча (кип-азахты машинкадаң тікче, швейнай фабрикада тоғынчатчаң);
3. чоохтан полча хакастап;
4. чоохтан полча орыстап;
5. пасча орыстап;
6. пасча хакастап (тың чахсы нимес);
7… паза даа пасха нимелер.
Прай сананып алғанда – он азыра пол парған. Минің хатхырарым кил парған: “Он азыра ла ба!” Туңмамнин санап сыххабыс, нинҷе пілінгенібісче хайди-да 40-50-ҷе чылхаа читкебіс. Мин позымнин санаанда 60-ҷа чылхаа читіріп алған полғам. Че, сынап чоохтаза, чылха санын санап сыхса, анда ноо-да килістіре оңдай поларға кирек. Чолда парчатхан аразында прай ит полчатхан хайыныстарыбысты читіре санан полбаан поларбыс ла, неке…
Аннаңар амды пӧгін тут парчам: пу кӱннерде хайди-да ипти арах, маңзырабин одырыбызап, санап кӧрерге пазох… Сынап таа: нимее мин пу чураста ӱгреніп алғам? Нинҷе аймах чылхаа хылиим читкен, хайзына, тізең, толкам айланмаан?
Че… амды за паза пір пазығларымда ол киректі толдыр кӧрерге сағыс пар, амды за – мыны толдыразынаң хығырып алған улусха улуғ алғыс! Кӱннің сай блогымда хакас тілнең пасчаң чылхамны тударға ам даа пӧгінчем чи!..