“Сайт”-ты хакастап хайди таңмалирға чарир?

0
316
сайт по-хакасски

“Сайт” теен сӧс хакас тiлiне орыстинаң сиип парған, анзына, тiзең, ол англиядағызининаң кiрген –sight [saɪt].

Анзында за sight [saɪt] теен сӧстiң кӧнi тузазы нинҷе-нинҷе таңмаларынаң палғалыстығ, танызып аларға чарир мында.

Че чарир ба ни зе сиип парған сӧске хакас тiлiнде ӧӧн позы сах орта таңмазын хаап халарға?

Ол сағысты толдырар ӱчӱн сайттың ӧӧн тузазын кӧрiбiзерге кирек. Сайт – интернетте чӧрчеткен кiзее харахха учурапчатхан иң пастағы ниме. Интернет иркiнiн ассох кiзi ноо-да сайтха кiр парча.

Ол принциптi санға алза, чарир пiди адап саларға: КӀРГӀС.

Че… “кiргiсте кӧрiбiс” чоохтанзабыс, пiлдiстiгӧк пол парарчых, че ноо-да ниме мында читпинчеткен осхас. Кiзi кiрчеткен нимелер саны хай парҷаң?..

Алай ба, таныхтирға кирек, сайт ол ноо-да ТАСХАХ iлгӧрi осхас интернетте орныхчатхан аймах-пасха информация ордызы алай ба тiлег орыны. “Тасхах” теен сӧс хоостыра кӧр килзе, арса, ТАСХАС адап саларға? Че анзы даа хайди-да… “хастар”-зар паза “тас”-тарзар тарт парыбысча.

Сайттың паза пiр килкiм тузазы ол информацияның ОРДЫЗЫ чiли тузаланылчатхан оңдайы. Арса, ОРДЫС сӧснең таныхтирға? Сынап чоохтаза, мағаа мынызы чағын арах, че… пазох Алтын Орда теен хазназар сағыс ойлап парыбысча.

Сайттың паза пiр иң тузалығ нимезi ол ПӀЛӀС теен нименең кӧнi палғалысчатханы. Арса, ПӀЛГӀН тiбiзерге?

Ниме пол парча? Ибiре-сибiре сӧстер аймағын кӧргенде, сағам мындағлары санға кiрдi: КӀРГӀС, ТАСХАС, ОРДЫС, ПӀЛГӀН паза… САЙТ.

Сiрер чи, аарлығ хығырығҷы, “сайт” теен нименi хакастап хайди адирчыхсар? Ӱндезiглернi мындох артызарға чарир!

НАНДЫРЫҒ ПАС ПИРӀҢЕР

Ӱндезииңерні пас пиріңер!
Адыңар мында пас пиріңер

  

доступен плагин ATs Privacy Policy ©