Сағын на кӧрiңер: полған на хакас тiллiг чайаачы кiзiнiң позының алынҷа блогы полған полза, хакас тiлi чiтче тiп сӱркӱңнеес чоохтастар табырах тоохтадыл парарчых. Хакас тiлi пасха тiллерӧк чiли алғымни позының чолынҷа хаалап одырарчых.
Хайдағ темаларға блогтарны идерге чарир?
Пiлдiстiг, нооза, полған на ВУЗ-тың ӱгретчiзi наукалар хоостыра ноо-да статьялар пасча. Нинҷе алғымни блогтар пiске кӧрiп аларға чарир поларчых амғы туста?
Кӧзiдмге алза, мындағ блогтар минiң хараама кӧрiнче амох:
- Хакас алыптығ нымахтары;
- Хакас кибелiстерi;
- Хакас прозазы;
- Хакас театры;
- Хакас тiлдеңер наукаҷа монографиялар паза статьялар;
- Хакас грамматиказы;
- Хакас тiлiндегi алҷаастарны тӱзетчең сайт;
- Хакас википедиязы;
- Хакас тiл ӱгретҷiлер сайты;
- Хакас тiлi – сӧбiреде;
- Хакас радиозының алынҷа блогы;
- Хакас кӧглерi, сарыннары; минусовкалар;
- Чатханнаар алынҷа блог;
- Хомыстаңар алынҷа блог;
- Хакас композиторлары; ноталар чыындызы;
- Г.Челбораковтаңар алынҷа блог;
- Ӱннiг, кӧрiглг кинделер сайты;
- Н.Ф.Катановтаңар алынҷа сайт;
- С.Д.Майнагашевтеңер алынҷа блог;
- Н.Г. Доможаковтаңар алынҷа блог…
Мыннаң мындар узарадарға чарир нинҷе дее, тоозылбас-парбас иде.
Интернет тирiглерi алғыпчатханда, кинде оңдайы чығырылып одырча. Чаҷын кинде компьютернi хаҷан даа ас полбас паза ағаа турбас. Мыны толдыразынаң оңнап алған улус, алнын ырахха кӧрчеткен улус пӱнгi тирiглернiң оңдайын алғымни хылыхха алып, компьютерге сыбыра ӱгренерге кӱстенчелер.
